E li strunza galleggianu, si sa,
tristi distinu ca nun lassa scampu
chi ti conferma in tutta libbertà
senza ssìri né aquila né lampu
ca quannu l'aria sbummica e fa fetu
la depuranza è mbrogghiu u chiù completu.
Ma iu la pagu già, sta depuranza,
e la bulletta grida e lacrimìa
quannu si penza netta e, Diu nni scanza,
s'attova ammenzu a tanta fitinzìa.
"A sciumi, a sciumi! Allasca a via di ddà."
E li strunza galleggianu, si sa.
Giovanni Piazza