di Giovanni Piazza (un piazzese)
Caro Prefetto, è detto e forse fatto:
nascere in quel di piazza non si può!
Ma a nui ca ormai nascimmu e per contratto
restiamo in questa veste rococò
chiazzisi di diritto e sempri sia,
làssini almenu qualchi fantasia.
La fantasia ca un populu sovranu
pozza manifistari pacifista
currennu e rucciuliannu chianu chianu
senza sturbari cu s'ha misu a lista
sulu pi sbummicari camurrìa.
Praticamenti, politicherìa.
Cu pòtisi ca tuttu stu paisi
pozza fari pirsuasa menza spranza
ca a quattru iorna o a n'annu e setti misi
sia digna d'attinzioni sta lagnanza
e ca lu smaccu a ginecologìa
sia sulu partu di sta fantasìa.
Già si purtanu tuttu nta lu cozzu,
caru Prefettu, e ciàvi un beddu pezzu
ca usannu la tagghiola a caputozzu
ni spogghianu d'eternu disattrezzu
e senza affruntu e russicu mbarazzu
ni fanu sempri mazzu e contramazzu.
E si nni levi puru la protesta
capisci ca è vanedda ca non spunta
prefettu miu, e ormai chistu n'arresta
pruvari di ribuffitu e di junta
si stu spitali di maternità
po' cuntinuari a fari lippu cca.
Certu dipenni assai di sta politica,
chidda politicanti ca si sa'
pi stu paisi ha sempri statu stitica
ma puru la chiù scura scurità
si ciàvi spranza, è già lustru di luna.
Con osservanza. Ciau. Buona furtuna.
Un piazzese
(Giovanni Piazza)