di Giovanni Piazza
Eh si, ciànu cchiù culu chi saluti,
sti chiazzisazzi beddi e furtunati.
Tutti sti tirritori cuprinchiuti
di li biddizzi cchiù sdisonurati
fanu di stu paisi beddu e riccu
la quintessenza di "tòcchimi Ciccu".
Ca tutti lu putissinu tastari
assummannu a lu nostru conquibussu,
ca ci nni furra, robba di taliari
e di stricari a tutti mussu mussu.
Pi nun parrari di Villa Romana
ca misa a novu senza friscanzana
è la tistimunianza cchiù priziusa,
putenti e formidàbbili struttura
ca ni scialassi a tutti di gazzusa
di tanta e mportantissima musura,
si munnu munnu è misa puzzi puzzi
comu la megghiu villa a ciappidduzzi.
Eh si, ciànu cchiù culu chi saluti,
sti chiazzisazzi beddi e furtunati.
Putissimu campari senza aiuti
beddi tranquilli e sempri sbardiddati
ma c'è u' condizionali, eh si, l'aucisi,
ca sbùmmica rialtà: semu chiazzisi!
Unu di sti chiazzisi
(Giovanni Piazza)