Putenzia di tassazioni...

di Giovanni Piazza

Chianci, Italia,
ca nonostanti la tassa sia oramai a livellu di furtu e di rapina
lu gettitu cumulativu cala.
E s’aumenta l’iva o’ vintitrì, ddu vintitrì…
Tecnici di stu cavulu…
.
Ma chi ci voli, pi capirla tutta!
Ca cu sti tassi già l'Italia è sfatta!
Cussì sauta ogni cosa ch'è già rutta
ca nuddu chiù di nenti si n'accatta!

.

Nun si capì, ca semu già a la frutta?
Nun si capì, ca semu a la disfatta?
Pagari l'imu puru pi na grutta,
si dici sì, ma mancu di sta fatta!

.

E la binzina cara? Sciutta sciutta
nni costa na furtuna ogni buatta
e comu na ficara quannu ngutta
s'avanza menu e sempri a panza chiatta.

.

Finimmu? Seee! C'è l'iva, sutta sutta
putenti e formidàbbili ca ammatta
pi d'ogni camurrìa ca sempri addutta
e sbùmmica nsacchetta e si va' nfratta.

.

Poi menti la pinzioni ca è distrutta,
poi menti lu travagghiu a malmignatta
e si capisci ca, sorti ca ammutta,
ecunumia cu morti è para e patta

.

Ma chi ci voli, pi capirla tutta!
Ca cu sti tassi già l'Italia è sfatta!
Doppu manciatu ormai mancu s'arrutta
cu stu guvernu tuttu catarratta.

.

Ma chi ci voli, pi capirla tutta!
Ca cu sti tassi già l'Italia è sfatta!
Pulitica oramai malacunnutta…
pirchì sulu di chistu ormai si tratta.

Giovanni Piazza