Prisepio

di Giovanni Piazza

I 
Chi ssi moddu, Totò, smòviti l'ossa! 
E chi ti dissi, ancora a menzaustu! 
La scagghiola, ti dissi, la chiù grossa
ca nel prisepio ci arrisalta giustu
e la stratella veni chiù latina
do Bammineddu ‘nfinu a chi camina.
II 

Il lippo ce l'abbiamo d'oggiallannu,
si nun ci abbasta, si ci fa na junta
cu na pezza di tò, chissi di pannu,
chissi chi quantappena si ci 'nfrunta
si stràzzanu, chissi chi t'accattasti
e ti 'nfrusanu senza mancu rasti.
III
Talìa, San Giusippuzzu senza testa!
Disgraziato, ma como l'hai sarvato
quannu smuntasti! Certu, a farla lesta,
di cursa ca parivi assicutato.
Ma non mi pozzo privaliri mai,
cara cummari, ancora e sempri guai.
IV
Quando non si li fa la suttascritta
su' ssulu botti d'àcitu e d'abbili,
ma poi, comu si po', càdiri a dritta
ristannu a caputrumma dei cchiù vili,
comu m'arriniscì, pi dirla chiara,
un beddu spicchiu di mènnula amara.
V
Biata lei, cara cummari mia,
ca nun s'ha maritatu in gioventù,
s'ha risparmiatu tanta camorrìa
ca in cunvivenza, chissu e bastacchiù.
Certu, ppi figghi, si, quannu su' boni,
ma puru chissi su' proccupazioni.
VI
S'arricàmpanu sempri, si è pi chissu,
no sulu quannu ciànu di bisogno.
Pe’ festi, e chi addumànnanu, pirmissu?
Iu restu ‘nta cucina e non mi scogno
e loro, tutti pi conforma su'
sempri a salottu a fari ciù-ciù-ciù.
VII
Spetta, Totò, mentri ca fai stu viaggiu…
la pècura e l'agneddu, e chi ti cuntu!
Talìa ‘nsocchi c'è ccà, ci vo' coraggiu
propriu farli arridùcere a stu puntu,
ma taliasse, cummà, chi grandi 'ngigno,
pi gamma ciànno il pròspero di ligno.
VIII
Non furra pei carusi, si, commare,
setti niputi setti, na tribbù,
su’ iddi, ca mi fanu trafichiare
finu a quannu Signuri bonucchiù.
L'amuri del prisepio grande assai
di mia si lu pigghianu. E quando mai,
IX
quell'àlbero mi appare scunchiuduto,
tutti ddi palli, e chi mi rappresenta!
Pari nun sacciu chi, poi, quanto ascuto
mi cunvincìu ca pigghia comu menta
pirchì 'sti cosi nòrdichi e brillanti
piàcino puru quannu su' vacanti.
X
Inveci col prisepio è un'altra cosa,
mancu Natali senza mi parissi,
cussì, cu ssi niputi e la za Rosa
ca gira chi ti gira, sempri i stissi,
ni mintemu puliti na jurnata
e conziamo sta grandi tavulata.
XI
Adarmiamo un macello, eppoi chi vuci:
"No, l'angiuliddu devi stari sutta"
"Cca mèttici u re maggiu sutta luci"
"Lèvila, sta quarèsima, ch’è rutta"
Nzumma, cummà, schifìu supra schifìu,
però sapissi quantu m'arricrìu.
XII
Eppoi lo guardo cento voti al giorno,
giustu qualcosa, sfilo un Paternostro,
tardu tanticchia e dopo ci arritorno,
cu veni veni, grapo e ce lo ammostro
si, propriu l'atmosfera tali e quali
ca ti fa diri, è beddu, stu Natali,
XIII
ca nonostanti tuttu è di bontà
co' Signuruzzu ca ni veni a trova,
e sai ca pi nautrànnu tornerà
puru si qualchedunu chianta chiova,
e ti rinventi ca nun fussi mali
si tutti i jorna fùssinu Natali.
XIV
Eh si, cara cummari, è propriu beddu,
la sira cu dda casa bedda china.
A menzanotti, a postu u Bammineddu,
tutti pari a la Missa ca si 'mbrina,
turnannu menzi trunzi e menzi cotti,
nni facemu l'auguri e buonanotti.
XV
E i carusi curcati a massarìa,
nsocchi s'adarma lei se l'affigura.
Poi, dopo il pranzo, sempri cca ni mìa,
ni salutamu; "Ciau" - "Sa' duna accura"
"Ci dobbiamo avvedere un po’ più spesso."
e già si penza al capudanno appresso.
(giovanni piazza)

ps. rubata dalla sua pagina Facebook